മെല്ബണ്: ഓസ്ട്രേലിയന് ഓപ്പണ് ടെന്നീസിന്റെ മൂന്നാം റൗണ്ടില് അട്ടിമറിയും മുന്നേറ്റവും. പുരുഷ സിംഗിള്സില് ഒന്നാം നമ്പറായ സ്പെയിനിന്റെ കാര്ലോസ് അല്കാരസും വനിതാ നമ്പര് വണ് ബെലാറൂസിന്റെ അരീന സബലെങ്കയും പ്രീക്വാര്ട്ടറില് പ്രവേശിച്ചു.
അതേസമയം, വനിതാ സിംഗിള്സില് ഏഴാം സീഡായ ഇറ്റലിയുടെ ജാസ്മിന് പൗളിനി, പുരുഷ സിംഗിള്സില് 13-ാം നമ്പറായ റഷ്യയുടെ ആന്ദ്രെ റുബ്ലെവ് തുടങ്ങിയവര് മൂന്നാം റൗണ്ടില് പുറത്തായി. മിക്സഡ് ഡബിള്സില് സാറ ഇറാനി - ആന്ഡ്രിയ വാവസോറിയും ഇന്നലെ പുറത്തായി.
സൂപ്പര് അല്കാരസ്
പുരുഷ സിംഗിള്സ് മൂന്നാം റൗണ്ടില് ഫ്രാന്സിന്റെ കൊറെന്റീന് മ്യൂടെറ്റിനെ നേരിട്ടുള്ള സെറ്റുകള്ക്കു കീഴടക്കിയാണ് അല്കാരസ് പ്രീക്വാര്ട്ടര് ഉറപ്പിച്ചത്. സ്കോര്: 6-2, 6-4, 6-1. അല്കരാസിന്റെ 87-ാമത് ഗ്രാന്സ്ലാം മത്സര ജയമാണ്. ഓപ്പണ് കാലഘട്ടത്തില് ആദ്യ 100 മത്സരങ്ങളില് ഏറ്റവും കൂടുതല് ഗ്രാന്സ്ലാം ജയമെന്നതില് ബ്യോണ് ബോര്ഗിനു (88) പിന്നില് രണ്ടാം സ്ഥാനത്തും അല്കാരസ് എത്തി.
11-ാം സീഡായ റഷ്യയുടെ ഡാനില് മെദ്വദേവ് അഞ്ച് സെറ്റ് നീണ്ട പോരാട്ടത്തില് ഹംഗറിയുടെ ഫാബിയന് മരോസാനെ കീഴടക്കി പ്രീക്വാര്ട്ടറില് ഇടംനേടി. ആദ്യ രണ്ട് സെറ്റ് നഷ്ടപ്പെട്ടശേഷം 6-7 (5-7), 4-6, 7-5, 6-0, 6-3നായിരുന്നു മെദ്വദേവിന്റെ ജയം.
മൂന്നാം സീഡായ ജര്മനിയുടെ അലക്സാണ്ടര് സ്വരേവ് 26-ാം സീഡായ ബ്രിട്ടന്റെ കാമറോണ് നോറിയെ കീഴടക്കി അവസാന 16ല് എത്തി. സ്കോര്: 7-5, 4-6, 6-3, 6-1. ഓസ്ട്രേലിയയുടെ അലക്സ് ഡി മിനൗര്, കസാക്കിസ്ഥാന്റെ അലക്സാണ്ടര് ബബ്ലിക് തുടങ്ങിയവരും പുരുഷ സിംഗിള്സ് പ്രീക്വാര്ട്ടറില് പ്രവേശിച്ചു.
അര്ജന്റൈന് താരം ഫ്രാന്സിസ്കൊ സെറുണ്ടോളോയാണ് 6-3, 7-6 (7-4), 6-3ന് റുബ്ലെവിനെ അട്ടിമറിച്ചത്.
സബലെങ്ക, ഗൗഫ്
വനിതാ സിംഗിള്സില് ഒന്നാം നമ്പറായ അരീന സബലെങ്ക ഓസ്ട്രിയയുടെ അനസ്താസിയ പൊട്ടപോവയെയാണ് മൂന്നാം റൗണ്ടില് കീഴടക്കിയത്. സ്കോര്: 7-6 (7-4), 7-6 (9-7). മൂന്നാം സീഡായ അമേരിക്കയുടെ കൊക്കൊ ഗൗഫ് സ്വന്തംനാട്ടുകാരിയായ ഹെയ്ലി ബാപ്റ്റിസ്റ്റിനെ 3-6, 6-0, 6-3നു കീഴടക്കി പ്രീക്വാര്ട്ടറില് ഇടംനേടി. എട്ടാം സീഡ് റഷ്യയുടെ മിറ ആന്ഡ്രീവ, 12-ാം സീഡായ യുക്രെയ്നിന്റെ എലിന സ്വിറ്റോളിന തുടങ്ങിയവരും പ്രീക്വാര്ട്ടറില് പ്രവേശിച്ചു.
അമേരിക്കയുടെ 29-ാം സീഡായ ഇവ ജോവിക്കാണ് ഏഴാം സീഡായ ജാസ്മിന് പൗളിനിയെ അട്ടിമറിച്ചത്. സ്കോര്: 6-2, 7-6 (7-3).
Deepika
E-paper LOGIN
LOGIN
